Këshillimi Smart - Tregu fruta - perimeve

Kërkesa e tregjeve europiane për fruta-perime

Europa është një treg i madh dhe i qëndrueshëm për shumicën e frutave dhe perimeve të freskëta. Europa është një treg i maturuar dhe i larmishëm për frutat dhe perimet e freskëta dhe renditet e 6-ta nga 10 vendet më të mëdha importuese në botë. Megjithëse nevojat afatshkurtra dhe çmimet ndryshojnë rregullisht, kërkesa e përgjithshme është relativisht e qëndrueshme dhe vëllimet janë të mëdha. Europa ka një popullsi prej mbi 530 milionë konsumatorë. Mesatarisht, Europa importon 55 milionë tonë fruta-perime në vit. Kjo është 40% e vëllimit mesatar vjetor global të tregtisë.

Karakteristikat e importit të frutave të freskëta në Europë janë të ndryshme nga importi i perimeve të freskëta. Gjatë viteve 2018-2022, vëllimi i importit të frutave u ul lehtësisht, duke rënë me një normë mesatare vjetore prej 0.5%.
Europa shënoi një rritje të vogël në importet e perimeve të freskëta, prej 1.5%. Konsumi i perimeve të freskëta varet shumë nga prodhimi vendas. Viti rekord 2022-2023 ishte viti i parë që vëllimi i importit nga vendet në zhvillim kaloi 3 milionë tonë. Kontribuesit më të rëndësishëm në këtë rritje janë vendet fqinje të Europës, pra Maroku, Turqia dhe Egjipti. Në periudhën afatshkurtër dhe afatmesme, vëllimet e importit dhe konsumit të fruta-perimeve të freskëta do të mbeten relativisht të qëndrueshme, por çmimet paraqiten me trend rritës për shkak të kostove më të larta të prodhimit. Megjithatë, inflacioni në tregjet Europiane mund të jetë një kërcënim serioz për konsumin Europian të frutave të freskëta, veçanërisht për produktet që tashmë janë më të shtrenjta në përgjithësi, që do të thotë se frutat bazë (molla, pjeshka, qershia, agrumet etj.) do jenë pjesë e qëndrueshme e shportës së konsumit.

Një tregues tjetër për zhvillimin e tregut dhe importit është rritja e popullsisë. Demografia brenda Europës paraqitet me një rënie të popullsisë në Itali, stabilizim në Gjermani dhe rritja e vazhdueshme e popullsisë në Francë, Holandë, Spanjë dhe Angli. Një popullsi në rritje paraqet një nxitje të rritjes së konsumit të produkteve të freskëta.

“Fermerë, tregu i fruta-perimeve ka kërkesë, por duhet të respektoni agroteknikën dhe standardet”.

“NOA Financon, NOA Këshillon”