Këshillimi Smart - Kultivimi i Luleshtrydhes

Kultivimi i luleshtrydhes për eksport

Shqipëria ka një rritje të ndjeshme në prodhimin dhe eksportin e luleshtrydheve, veçanërisht në rajonin e Fierit. Në zonën e Frakullit, rreth 280 fermerë kultivojnë luleshtrydhe në një sipërfaqe totale prej 180 hektarësh. Gjatë sezonit, prodhimi arrin afërsisht 7,400 ton, nga të cilat rreth 40% eksportohen në tregjet europiane si Itali, Rumani, Poloni, Bosnjë, Çeki, Serbi. Aktualisht, eksportojmë rreth 2,720 ton luleshtrydhe, në një vlerë rreth 5.4 milion USD. Për një rendiment të lartë dhe cilësi, shërbimet agronomike luajnë një rol kyç, nga ku mund të përmendim:
1. Përgatitja e Tokës
Analiza e Tokës – Duhet të bëhet një analizë kimike për të përcaktuar nivelin e pH-së dhe përmbajtjen e lëndëve ushqyese. PH optimal i tokës për luleshtrydhet është 5,5-6,5.
Përmirësimi i Tokës – Rekomandohet plehërimi organik dhe mineral për të pasuruar tokën me azot (N), fosfor (P) dhe kalium (K).
Sterilizimi i Tokës – Përdorimi i solarizimit 4-6 javë përpara ose dezinfektantëve për të eliminuar patogjenët dhe barërat e këqija.
2. Zgjedhja e Fidanëve dhe Mbjellja
Zgjedhja e Kultivarëve – Varietetet më të mira për kultivim në tunele janë ato me rendiment të lartë dhe rezistente ndaj sëmundjeve.
Dendësia e Mbjelljes – Zakonisht mbillen në dy rreshta për çdo shtrat, me distancë 25-30 cm mes bimëve.
Koha e Mbjelljes – Mbjellja bëhet në vjeshtë ose në fillim të pranverës, në varësi të strategjisë së kultivimit.
3. Menaxhimi i Ujitjes dhe Plehërimit
Sistemi i Ujitjes – Rekomandohet ujitja me pika për të shmangur lagështinë e tepërt dhe për të siguruar shpërndarjen e barabartë të ujit.
Plehërimi i Balancuar – Përdoren plehra të tretshëm në ujë përmes fertigimit, bazuar në nevojat e bimës në faza të ndryshme të rritjes. Mundësisht përdorim të nitrogjenit (N) në stadet e para, fosforin (P) dhe kaliumin (K) për të përmirësuar formimin dhe cilësinë e frutave.
4. Kontrolli i Temperaturës dhe Ventilimi
Rregullimi i Temperaturës – Temperaturat optimale gjatë ditës 18–25°C dhe gjatë natës 5–10°C. Gjatë motit të nxehtë, hapen anësoret e serës për ajrim të duhur.
5. Kontrolli i Lagështisë.
Mbani 60-70% lagështi relative për të parandaluar sëmundjët mykotikë. Duhët përdorur ventilimi i duhur për të shmangur ujitjen e tepërt.
6. Mbrojtja nga Sëmundjet dhe Dëmtuesit.
Botrytis është nga sëmundjet më të shpeshta, i cili kërkon një ajrosje të serës (tuneleve) dhe aplikimin e trajtimeve me fungicide. Gjithashtu të shmanget lagështia e lartë dhe të sigurohet tokë e drenazhuar mirë, si dhe të shmanget ujitja e tepërt. Të përdoret lufta biologjike ose me insekticide në rastet e krahëbardhës apo afideve.
7. Periudha e vjeljes dhe trajtimi pas-vjeljes
Vjelja – Kryhet në mëngjes ose pasdite për të shmangur dëmtimin e frutave nga nxehtësia dhe produkti të ruhet në temperatura të ulta.

“NOA Financon, NOA Këshillon”