Agroturizmi, një trend i ri në Shqipëri

Në vitin 2023 Shqipëria ka arritur rekordin e 10 milionë turistëve, duke shënuar vitin më të mirë turistik. Gjatë vitit 2023, vizitorët kryesorë kanë qenë nga: Spanja me më shumë se dyfishi i vizitorëve krahasuar me vitin 2022, Turqia me 142% më shumë, por ka edhe rritje të numrit të vizitorëve nga Mali i Zi me 62% më shumë, Franca me 58% më shumë dhe Italia me 53% më shumë. Gjatë vitit 2023, vlera financiare e gjeneruar nga turizmi arriti në 4.2 miliard Euro.

Agroturizmi është një ndërthurrje sipërmarrjesh që bashkon aktivitetet e prodhimit dhe përpunimit bujqësor me turizmin me qëllim argëtimin dhe rekreacionin e turistëve. Ai u ofron fermerëve një mundësi për të gjeneruar të ardhura shtesë dhe një rrugë për një marketing të drejtpërdrejtë për konsumatorët.

Në vitin 2024, madhësia e tregut global të agroturizmit arriti në 73.2 miliardë dollarë. Ky treg parashikohet të arrijë në 205.6 miliardë dollarë deri në vitin 2033, pra një normë rritjeje prej 10.9% në vit përgjatë viteve 2025-2033. Tregu po drejtohet nga fokusi në rritje në zhvillimin rural, trashëgimërisë kulturore-historike, shoqëruar me një rritje të ndërgjegjësimit për praktikat e qëndrueshme. Aktualisht, Euopa mban pjesën më të madhe të tregut, e nxitur nga trashëgimia e saj e pasur bujqësore, infrastruktura e fortë e turizmit rural, natyrës dhe peisazhit, kulinaria dhe mbështetja e gjerë nëpërmjet politikave për bujqësinë e qëndrueshme dhe praktikat turistike.

Agroturizmi është një biznes fitimprurës kur menaxhohet në mënyrë efektive. Rentabiliteti varet nga faktorë të ndryshëm, duke përfshirë vendndodhjen, konceptin e aplikuar, llojin e aktiviteteve të ofruara, kërkesën e tregut dhe aftësinë për të tërhequr vizitorët. Në Europë vlerësohet që agriturizmi mund të gjenerojë të ardhura midis 50,000$ deri 500,000$+ në vit, në varësi kjo të vendndodhjes, llojit të investimit dhe marketingut të duhur. Investimet në agroturizëm kryesisht lidhen me: a). Rinovim të shtëpive të vjetra rurale; b). Investime në fermë; c). Pajisje për përpunimin e produkteve bujqësore dhe blegtorale; d). Marketim dhe brandim, zhvillim të faqeve të internetit dhe fushatat me media sociale; e). Panele diellore për energji elektrike për vetë konsum.

Këto investime mbështeten nga institucioni mikro-financiar NOA, me produkt specifik ku norma e interesit është preferenciale.