Këshillimi Smart - Skemat e granteve kombëtare për investimet në 3 tipe serash

Skema e granteve kombëtare për 3 tipe serash për vitin 2024

Prodhimi i perimeve në serë ofron një mjedis ideal për një kultivim me eficiencë të lartë, duke optimizuar rendimentet dhe duke siguruar cilësinë e prodhimit gjatë gjithë viti. Në skemat e granteve për investime të akorduara nga Qeveria Shqiptare përfshihen ndërtimi i serave diellore me sipërfaqe jo më pak se 0.2 ha (dy dynym) dhe jo më shumë se 2 (dy) ha për subjekt, së bashku me instalimin e sistemit të ujitjes, duke përfshirë 3 tipologjitë e serave prodhuese, si më poshtë:

- Serat e prodhimit të perimeve, ku masa e grantit arrin deri në 15,000,000 (pesëmbëdhjetë milion) lekë/ha;
- Serat e prodhimit të rrushit për tavolinë, ku masa e grantit arrin deri në  8,000,000 (tetë milion) lekë/ha;
- Serat (tunelet plastike) të prodhimit të luleshtrydheve, ku masa e grantit arrin deri në 4,000,000 (katër milion) lekë/ha.

Këto grante mbulojnë deri në 50% të shpenzimeve të investimit të tipologjive të serave të përshkruara më lart.
Fermerët mund të aplikojnë për këto grante deri në datë 8 Nëntor 2024.

Dokumentet për fermerët që të aplikojnë për këto grante

·Formulari i aplikimit sipas Aneksit përkatës;
·Dokumentin  e regjistrimit në QKB që vërteton statusin e aplikuesit (individ, subjekt me status fizik, juridik, SHBB);
·Plan biznesi i printuar dhe në CD i detajuar për 5 vjet;
·Dëshminë e penalitetit për aplikantët me status fermer dhe person fizik dhe për aksionerët për aplikuesit me status juridik, SHBB; (në gjykatë dhe prokurori, për NIPT-in dhe si individ);
·Raporti i kredimarrësit nga Banka e Shqipërisë/ banka të nivelit të dytë për aplikuesin (për personin dhe NIPT-in);
·Oferta origjinale për prodhimin e serës;
·Dokumenti origjinal ose fotokopje e noterizuar e lejes së ndërtimit/miratim i deklaratës paraprake/njoftim punimesh;
·Projekti arkitektonik i serës, planvendosja e serës,  preventivi për punimet civile nga personi i licencuar;
·Vërtetimin e lëshuar nga Drejtoria e Tatimeve që vërteton se aplikuesi ka përmbushur detyrimet tatimore dhe sigurimet shoqërore;
·Dokumenti i pronësisë së tokës ose qirasë, për të paktën 5/7 vjet duke filluar nga viti i aplikimit, certifikata e pronësisë, harta treguese dhe kartela e rifreskuar e pasurisë (kartela duhet të jetë lëshuar jo më herët se 3 muaj para aplikimit) ose akti i marrjes së tokës në pronësi (AMTP), sipas legjislacionit për ndarjen e tokës bujqësore, bashkëlidhur me fragmentin e hartës kadastrale, që konfirmohet nga ASHK dhe Bashkia.

FERMERË! Kontaktoni degët e NOA-s në rrethe per te marrë këshillimin e duhur nga ekspertët tanë profesionistë të dedikuar për procesin e aplikimit dhe në të njëjtën kohë njihuni me produktin financiar adekuat për të mbuluar pjesën tuaj të investimit prej 50%.

“NOA Financon, NOA Këshillon”