Këshillimi Smart - Trendi i hudhrës

Kultivimi dhe potencialiteti ekonomik i hudhrës

Hudhra (Allium sativa) përfshihet në familjen e qepës. Kultivimi i hudhrës në Shqipëri në 5 vitet e fundit ka tregues të rëndësishëm për shkak të kërkesës së lartë në tregun vendas dhe atë ndërkombëtar. Në Shqipëri, kultivimi i hudhrës rezulton me luhatje gjatë viteve 2000 – 2019, nisur nga fakti që vetëm në vitin 2010 janë kultivuar plot 1000 ha me hudhra. Gjatë tre viteve të fundit, prodhimi i hudhrave në vend është rritur mesatarisht me rreth 20% krahasuar me vitin 2019. Në vitin 2022, prodhimi shqiptar i hudhrës arriti në afro 19,039 ton.

Nga statistikat UNSTAT 2023, rezulton që Shqipëria ka një diversivitet në kultivimin dhe tregtimin e hudhrës, nga ku vërehet që pavarësisht një prodhimi prej 19,039 ton, importon një sasi prej 1,812 ton dhe në të njëjtën kohë eksporton një sasi prej 1,391 ton. Ky bilanc tregon edhe njëherë potencialitetin e kultivimit të hudhrës për t’u bërë një faktor në eksporte dhe për të ndikuar në minimizimin e importeve.

Si paraqitet tregtia e hudhrës në botë?

Nga ana agroteknike, hudhra është një nga kulturat më të lehta krahasuar me grupin e perimeve. Kërkesa botërore është shumë e lartë dhe tregjet kryesore të eksportit janë Rusia, Polonia, Gjermania, Hollanda, Franca, Sllovenia, Italia, SHBA, Greqia dhe Çekia.

Nga statistikat tregtare shikohet pothuajse të gjitha vendet Europiane paraqesin kërkesë të lartë për kulturën e hudhrës. Në këtë buletin kemi marrë në analizë vende që Shqipëria ka flukse tregtare të prodhimeve bujqësore, pra Italinë, Greqinë dhe Çekinë. Të dhënat e siguruara nga FAOSTAT dhe UNSTAT, rezultojnë një defiçit i lartë prodhues dhe tregtar në kulturën e hudhrës. Italia paraqitet me një kërkesë shumë të lartë për hudhër, në një volum prej 23,131 ton dhe vlerë financiare prej 60.2 milion USD. Edhe Çekia paraqet një kërkesë në volum prej 5,905 ton dhe vlerë financiare 18.2 milion USD. Greqia importon 3,671 ton hurdhër, me një vlerë financiare prej 7.2 milion USD.
Shqipëria duhet të përfitojë nga kërkesa për këto lloj produktesh nisur edhe nga fakti që mundësia për të kultivuar në aspektin e tokës, klimës dhe njohurive agroteknike është e lartë.

“NOA Financon, NOA Këshillon”