Këshillimi Smart - Trendi i mandarinave

Parashikimi i trendit të mandarinës për 2024

Prodhimi i mandarinës në BE për vitin 2024 parashikohet në 2.7 milionë ton, nga 2.8 milionë ton në sezonin e kaluar. Të gjithë prodhuesit kryesorë parashikohen të kenë rënie të prodhimit. Importet e tangerinës dhe mandarinës në BE parashikohen të jenë rreth 470,000 ton kundrejt 482,000 ton sezonin e kaluar. Afrika e Jugut, Maroku, Izraeli dhe Turqia janë furnizuesit kryesorë të BE-së me tangerina dhe mandarina.
Bazuar në statistikat e vitit 2023 në Shqipëri janë mbjellë 1,513,000 rrënjë me agrume, me një prodhim prej 56,729 ton. Mandarina zë peshën kryesore në prodhimin e agrumeve me 36,043 ton. Rreth 80% të prodhimit të mandarinës realizohet në qarkun e Vlorës, specifikisht në Bashkinë Konispol (73.5%).

Si paraqitet trendi botëror i mandarinës?

Tregu i mandarinës në BE paraqet kërkesë në rritje, ndërkohë që prodhimi i saj nga vendet lider prodhuese në BE është në ulje. Pra, brenda BE-së, prodhimi i mandarinës paraqitet në rënie, treg ky që pritet të plotësohet nga prodhimi i importit, dhe kryesisht Turqisë dhe Maroku.
Gjermania: Kërkesa për mandarina dhe klementina vazhdon të jetë evidente, ndërkohë që cilësia e ofruar nuk është e kënaqshme për konsumatorët. Furnizimi kryesisht vjen nga Spanja, Turqia, Maroku, Egjipti dhe Italia. Për klementinën, oferta nga Italia dhe Spanja po zvogëlohet ndjeshëm. Çmimi me pakicë për mandarinën në Gjermani është midis 1.19 – 2.22 USD/kg.
Turqia: Prodhimi i tangerinës/mandarinës në Turqi për  vitin 2024 vlerësohet të rritet me 55-60%, në 2.9 milionë ton, për shkak të rritjes së sipërfaqeve të kultivuara dhe motit të favorshëm. Me rritjen e prodhimit, eksportet vlerësohen të rriten me 17-20%, pra në rreth 1 milionë ton. Eksportet e Turqisë startojnë nga Tetori në Maj, duke arritur kulmin në Dhjetor.
Italia: Prodhimi i tangerinës dhe mandarinës në Itali parashikohet të bjerë me gati 10% për shkak të temperaturave jo normale të nxehta në Siçili, një nga rajonet më të mëdha prodhuese të Italisë.
Greqia: Prodhimi i mandarinës për vitin 2024 pritet të ulet me 10-15% për shkak të motit të pafavorshëm në Greqinë perëndimore, gjë që do ndikojë në rendimentet e klementinës. Greqia ka kërkesa të larta për eksport, por ka shumë pak diversitet varietetesh krahasuar me Spanjën dhe Italinë.
Spanja: Prodhuesi më i madh i tangerinës dhe mandarinës në BE, për vitin 2024 parashikohet të ulet. Megjithatë, rënia e prodhimit të tangerinave dhe mandarinave në Spanjë nuk parashikohet të jetë aq i madh sa në Greqi apo Itali. Spanja oferton me çmime të ulëta për mandarinat hibride. Gama e çmimeve me pakicë për mandarinat spanjolle është midis 0.79 -1,77 USD/kg.
Shqipëria: Nga prodhimi i mandarinës prej rreth 36,043 ton, rreth 20,000 ton eksportohen, veçanërisht në vendet Ballkanike dhe Europës Jug-Lindore. Prodhimi i vitit 2024 duket i lartë, parashikohet të arrijë në 40,000 ton, ku rritja e standardit dhe cilësisë do të mundësojë eksportet drejt vendeve të BE-së, mundësi kjo për të gjeneruar fitime më të larta.

“NOA Financon, NOA Këshillon”