Këshillimi Smart - Vjelja dhe ruajtja e mollës

Vjelja dhe ruajtja e mollës

Në Shqipëri janë mbjellë rreth 21,065 ha me pemë frutore, ku peshën kryesore e zë molla. Molla kryesisht kultivohet në rajonin e Korçës dhe Dibrës. Sipërfaqja e tokës së kultivuar me mollë është rreth 4,741 ha me një prodhimtari në shkallë kombëtare me rreth 103,645 ton mollë. Peshën kryesore e zë qarku i Korçës me rreth 2,273 ha (52%), i ndjekur nga qarku i Dibrës me 439 ha (10%), si dhe nga qarku i Fierit me 396 ha (9%).
Vlerësime të përafërta sugjerojnë se kostoja për prodhimin e ushqimit që shpërdorohet ne botë është rreth 750 miliardë USD dhe rreth 1.3 miliardë ton, e mjaftueshme për të ushqyer 2 miliardë njerëz në mbarë botën.
Humbjet vjetore të produkteve bujqësore në botë variojnë nga 5% në 35% dhe për vendet në zhvillim, si Shqipëria, variojnë nga 20-50% humbje para se të arrijnë tek konsumatorët.

Teknologjia pas vjelje së mollës

Teknologjia pas vjeljes për mollët përfshin një gamë të gjerë metodash dhe praktikash që synojnë ruajtjen e cilësisë, shijes dhe jetëgjatësisë së mollëve pas vjeljes.
Para-ftohje. Menjëherë pas vjeljes, mollët i nënshtrohen procesit të paraftohjes. Kjo përfshin vendosjen e mollëve të sapo vjelura në një mjedis të ajrosur mirë dhe të kontrolluar nga temperatura. Qëllimi kryesor këtu është heqja e nxehtësisë së mbetur nga fusha gjatë grumbullimit dhe transportit në magazinë.
Klasifikimi. Mollët klasifikohen në bazë të madhësisë, pamjes dhe cilësisë së përgjithshme të tyre. Procesi i klasifikimit përfshin renditjen manuale në gjashtë kategori të madhësive të ndryshme. Këto klasifikime cilësore janë pjesë e standardeve  që përcaktohen nga klasat si AAA, AA, A; A, B, C.
Magazinimi/ruajtja frigoriferike. Mollët pas vjeljes mund të ruhen për një periudhë të gjatë, duke filluar nga katër deri në tetë muaj. Ambientet e ruajtjes së ftohtë ofrojnë mjedisin optimal për ruajtjen e freskisë së mollës. Këto njësi magazinimi mbahen me kujdes në temperatura specifike, që zakonisht variojnë nga -1°C deri në 4°, me nivele lagështie të ruajtura në 85-90%. Kushtet e tilla të kontrolluara ndihmojnë në vonimin e procesit të pjekjes, duke parandaluar prishjen e mollës dhe siguri tregu.

“NOA Financon, NOA Këshillon”