Këshillimi Smart - Trendi i portokalleve

Parashikimi i trendit të portokallit për vitin 2024

Në Shqipëri, prodhimi i portokalleve ka njohur një rritje të konsiderueshme në vitet e fundit. Në vitin 2017, vendi prodhoi rreth 9,100 ton portokalle nga 200 hektarë të mbjellë, ndërkohë që sipërfaqja e kultivuar në vitin 2023 ka arritur në 242 ha dhe një prodhim prej 14,636 ton. Kërkesa për portokallet shqiptare mbetet e lartë, megjithëse prodhimi ndikohet nga faktorë të jashtëm si thatësirat dhe konkurrenca nga vendet fqinjë​.

Kërkesa e lartë për portokalle vërehet edhe nga shkalla e konsumit të brendshëm, ku 62% mbulohet me prodhim të brendshëm dhe pjesa tjetër prej 38% nga importi. Shqipëria importon rreth 9,142 ton portokalle, në një vlerë prej 2.9 milion USD. Importi më i lartë i relatohet Greqisë, me një volum prej 8,257 ton dhe vlerë financiare prej 2,378,094 USD.

Si paraqitet trendi botëror i portokallit?

Tregu i portokallit në BE parashikon një luhatje të ndjeshme gjatë vitit 2024. Prodhimi parashikohet të bjerë, me një rënie të ndjeshme prej gati 13% nga sezoni i kaluar, duke prekur kryesisht Spanjën, Italinë dhe Portugalinë. Prodhimi i portokallit në Spanjë pritet të bjerë me 23% për shkak të kushteve të pafavorshme të motit gjatë periudhave kryesore të zhvillimit agroteknik. Në Itali, prodhimi është gjithashtu pak më i ulët, veçanërisht në Siçili, për shkak të thatësirës. Greqia parashikon një rritje të prodhimit të portokallit për shkak të kushteve të favorshme.

Për shkak të kësaj rënie të prodhimit, BE-ja pritet të rrisë importet e portokallit. Furnizuesit kryesorë të BE-së përfshijnë Afrikën e Jugut, Egjiptin, Marokun, Zimbabvenë dhe Argjentinën. Për sa i përket tendencave të konsumit, kërkesa për portokall dhe lëng portokalli mbetet e fortë, veçanërisht gjatë muajve të dimrit për shkak të përfitimeve të tyre shëndetësore.
Në përgjithësi, sektori i kultivimit të portokallit në Shqipëri përballet me disa sfida, ai gjithashtu ka një potencial të konsiderueshëm për rritje produktiviteti, veçanërisht me infrastrukturë të përmirësuar, akses më të mirë në treg dhe financim direkt të fermerëve.

“NOA Financon, NOA Këshillon”